الأسبوع الرابع من الحمل

نمو الجنين

فات شهر. دلوقتي، بيبدأ الجنين في إنه يستقر جواكي؛ البويضة بتثبت جوا الرحم وبيتكوّن السائل الأمنيوسي (ده سائل غذائي بيحمي الجنين) والمشيمة (اللي بتمده بالأوكسچين والعناصر الغذائية وبتحافظ عليه من الجرِاثيم). بتكبر البويضة وبتبقى حوالي ٠،٢ ملي متر في القُطر، وبتبتدي تتكوّن الحدود الخارجية للأعضاء الداخلية وإمدادها بالدم. في نهاية الأسبوع الرابع، شكل جنينك بيبقى عبارة عن علامة مدوّرة عايمة في السائل الأمنيوسي. من وقت بداية الحمل ولحد الأسبوع الرابع بيتضاعف وزنه بمقدار ١٠،٠٠٠ ضعف.

جسمك

بيفرز جسمك موجة من الهرمونات اللي بتمنع الپيريود واللي بتضمن كل النمو اللي بيحتاجه ابنك أو بنتك (لسه مش عارفين). لو مدخنة يبقى لازم تبطّلي سجاير دلوقتي.

نظام أكلك

أبعدي عن الأكل الني زي البيض الني (المايونيز على فكرة من مكوناته البيض الني) وأبعدي عن السمك الني زي السوشي والسالمون لأنهم ممكن يسببوا لك تسمم. أغسلي إيدك باستمرار. أغسلي الخضار والفاكهة كويس قبل ما تاكليهم. نضفي الأماكن اللي بتشيلي فيها الأكل كويس. تجنبي الأكل البايت أو بواقي الأكل لأن ممكن يبقى بايظ...وأفتكري الحكمة المعروفة "الوقاية خير من العلاج"

نصايحنا

العناصر الغذائية مهمة جدًا خلال فترة الحمل. بينصح تتاخد من النظام الغذائي بس ساعات بيبقى نظامك مافيهوش العناصر الكافية، علشان كده استشيري دكتور في إمكانية إنك تاخدي مكملات غذائية فيها كمية كافية من الحديد والكالسيوم وڤيتامين د. خدي بالك! بلاش تعملي صيدلي وتاخدي حاجات من نفسك أو حد قالك عليها لأن مثلًا الجرعات الغلط من ڤيتامين أ أو ڤيتامين د أو السيلينيوم أو الفلور ممكن تبقى غلط على الجنين.